काठमाडौं । नेपालले आईसीसी क्रिकेट विश्वकप लिग–२ अन्तर्गत त्रिकोणात्मक एकदिवसीय शृंखलामा आज नामिबियाको सामना गर्दै छ ।

खेल नेदरल्यान्ड्सको उट्रेचस्थित स्पोर्टपार्क मार्सचाल्करविर्डमा नेपाली समयअनुसार दिउसो २ः२५ बजे सुरु हुनेछ ।

घरेलु मैदानमा सम्पन्न पछिल्ला दुई शृंखलाका आठमध्ये ६ खेल जितेर नेदरल्यान्ड्स पुगेको नेपालको मनोबल उच्च छ । नेपाल यो शृंखलामा पनि त्यही लय कायम राख्ने योजनामा छ ।

नेपालले एकदिवसीय अन्तर्राष्ट्रिय क्रिकेटमा नामिबियाविरुद्ध आठ खेल खेलेको छ । जसमा नेपालले पाँच हार र दुई जितको नतिजा निकाल्दा एक खेल भने बिनानतिजा टुंगिएको छ ।

नेपालले पछिल्ला दुई खेलमा नामिबियासँग पराजय व्यहोरेको छ । सन् २०२४ मा सम्पन्न शृंखलामा नेपाल घरेलु मैदानमै चार र दुई विकेटले निराश बनेको थियो ।

सिधै विश्वकपको ग्लोबल छनोटमा स्थान बनाउन नेपाललाई बाँकी आठ खेल जित्नैपर्ने दबाब छ । नेपालले आफ्ना सबै खेल जितेरमात्र पुग्दैन स्कटल्यान्ड, नेदरल्यान्ड्स र ओमानको नतिजा पनि कुर्नुपर्ने हुन्छ ।

अमेरिकाले ग्लोबल छनोटमा स्थान बनाइसकेको छ । अब तीन बाँकी तीन स्थानका लागि सात प्रतिस्पर्धामा छन् ।

हाल २८ खेलमा २४ अंक जोडेको नेपाल पाँचौँ स्थानमा छ । नामिबिया पनि समान खेलबाट २२ अंकका साथ सातौँ स्थानमा छ ।