फिफा विश्वकपको तेस्रो स्थानका लागि फ्रान्स र इंग्ल्यान्डबीच प्रतिस्पर्धा हुँदै छ । खेल आइतबार बिहान २ः४५ मा अमेरिकाको मियामी गार्डेन्समा सुरु हुनेछ ।
सेमिफाइनलमा फ्रान्सले स्पेन र इंग्ल्यान्डले अर्जेन्टिनासँग पराजय व्यहोरेका थिए । यो खेल टोलीका लागि मात्र नभएर व्यक्तिगत उपलब्धिका लागि पनि महत्वपूर्ण छ ।
यो खेलमा कम्तिमा पनि एक गोल गर्न सके फ्रेन्च स्टार केलियन एमबाप्पेका लागि गोल्डन बुटको यात्रा सहज हुन सक्छ ।
हाल एमबाप्पे र अर्जेन्टिनाका कप्तान लियोनल मेस्सीले समान आठ गोल गरेका छन् ।
फ्रान्स र इंग्ल्यान्डका लागि यो खेल सेमिफाइनलमा गरेका गल्तीहरूलाई सुधार गर्ने मौका रूपमा पनि रहनेछ ।
दुवै टोलीका लागि यो खेल प्रतिष्ठाको लडाइँका रूपमा हुनेछ ।
फ्रान्स सन् १९८६ पछि पहिलोपटक तेस्रो स्थानका लागि प्रतिस्पर्धा गर्दै छ । त्यसपछि पाँच सेमिफाइनल खेलेको टोली दुईपटक च्याम्पियन र दुईपटक उपविजेता बनेको छ ।
सन् १९९८ र २०१८ च्याम्पियन फ्रान्स २००६ र २०२२ मा उपविजेता बनेको थियो ।
यता, इंग्ल्यान्ड सन् २०१८ पछि तेस्रो स्थानका लागि भिड्दै छ । सन् २०१८ मा बेल्जियमसँग पराजित भएपछि इंग्ल्यान्ड चौथो स्थानमै सीमीत बनेको थियो ।
सन् १९६६ को च्याम्पियन इंग्ल्यान्ड त्यसपछि विश्वकपको फाइनलमा पुग्न सकेको छैन ।
केलियन एमबाप्पेको नेतृत्वमा रहेको फ्रान्सलाई ओस्माने डेम्बेले, माइकल ओलिसे, ब्राडली बार्कोला, औरेलियन चुबामेनीजस्ता खेलाडीको साथ रहनेछ ।
यता, ह्यारी केनको कमान्डमा रहेको इंग्ल्यान्डले जुड बेलिङघम, एन्थोनी गोर्डन, जोर्डन पिकपोर्ड, डेक्लान राइसजस्ता खेलाडी मैदान उतार्नेछ ।
‘हेड टु हेड’
विश्वकपको इतिहासलाई हेर्ने हो भने फ्रान्सभन्दा इंग्ल्यान्ड केही बलियो देखिन्छ । विश्वकपमा यी दुईबीच तीन खेल हुँदा इंग्ल्यान्डले दुई र फ्रान्सले एक खेल आफ्नो पक्षमा पारेका छन् ।
यी दुई पहिलो पटक सन् १९६६ को विश्वकपका प्रतिस्पर्धा गरेका थिए । उक्त खेलमा इंग्ल्यान्डले २–० को जित निकालेको थियो ।
सन् १९८२ को विश्वकपमा पनि इंग्ल्यान्ड ३–१ ले विजयी भएको थियो । सन् २०२२ को पछिल्लो भेटमा भने फ्रान्स २–१ को जित निकाल्न सफल भएको थियो ।
