काठमाडौँ । नेपाली क्रिकेट टोलीका उपकप्तान दिपेन्द्रसिंह ऐरीले नेपाल प्रहरीबाट राजीनामा दिएका छन् । सन् २०१६ देखि नेपाल प्रहरी सेवामा प्रवेश गरेका ऐरीले गत बैशाखमा राजीनामा बुझाएका हुन् ।

नेपाल प्रहरी क्रिकेट टोलीका कप्तानसमेत रहेका ऐरीले २०८२ बैशाख २८ गते राजीनामा दिएका हुन् । ऐरीले राजीनामा दिएको विषय नेपाल प्रहरीका केन्द्रीय प्रवक्ता विनोद घिमिरेले पुष्टि गरे । ‘उहाँले राजीनामा दिनुभएको हो । राजीनामा स्विकृत समेत भइसकेको छ ।’

यस विषयमा ऐरीले भने आफू अहिले केही नबोल्ने बताएका छन् ।  उनले भने, ‘अहिले यसबारे नबोलौँ । कुनै समय भनाैँला नि ।’

ऐरीले आफ्नो राजीनामा पत्रमा घरायसी कारण भएको उल्लेख गरेपनि उनी विदेश पलायन हुने मनशायका साथ राजीनामा बुझाएको आँकलन गरिएको छ ।

ऐरी २०८० असोजमा प्रहरी सहायक हवल्दारमा बढुवा भएका थिए । नेपाल प्रहरी क्रिकेट टोलीका कप्तानसमेत रहेका ऐरीले चीनमा भएको एसियन खेलमा मंगोलियाविरुद्ध ऐतिहासिक अर्धशतक प्रहार गरेपछि उनको बढुवा भएको थियो ।