बकुल्लहरी जलदेवी मन्दिर परिसरमा चलिरहेको रात्रिकालीन मेला जहाँ एकातिर भव्य भीड लागेको छ, उस्तै समयमा अर्को पक्ष भने चर्को विवादको विषय बनेको छ। स्थानीय तथा राष्ट्रिय स्तरमा पहिचान बनाएका कलाकारलाई बेवास्ता गर्दै बाहिरका कलाकारलाई प्राथमिकता दिएको भन्दै स्थानीय कलाकारहरूले कडा असन्तुष्टि जनाएका छन्।
स्थानीय कलाकारहरूले बताएको अनुसार दिउँला चिनो, युके लन्डन, आन्टी लभर जस्ता चर्चित गीतहरू गाई चुकेका शीतल गुरुङ र रमेश परियार—जो त्यही लेवाटारमै जन्मिए, हुर्किए र आज राष्ट्रिय तथा अन्तर्राष्ट्रिय स्तरमा ख्याति प्राप्त छन्—उनीहरूलाई आफ्नै जन्मथलोमा आयोजित कार्यक्रममा नसम्झिनु अन्यायपूर्ण र अपमानजनक भएको छ।
उनका अनुसार—“जन्मिएका, हुर्किएका र आफ्नो गाउँको नाम विश्वभर फैलाएका कलाकारलाई बेवास्ता गरेर बाहिरको कलाकार ल्याउनु किन? क्षमता नभएर हो कि कुनै चलखेल भयो? बुझ्न सकिएको छैन।”
स्थानीय कलाकारहरूले आयोजन समितिलाई ठोस प्रश्न गर्दै भनेका छन्—“आफ्नो माटोका कलाकारलाई सम्मान नगरी मेला सफल हुँदैन। एउटा बाहिरको मान्छे बोलाएर कार्यक्रम चलाउनैपर्ने बाध्यता थिएन। हामीसँग कला पनि छ, क्षमता पनि छ।”
कलाकारहरूले जन्मभूमिप्रतिको कदर गर्न आयोजकलाई आग्रह गर्दै थपे—“एउटा पुषले जाडो जान्न; बाहिरको कलाकार ल्याएर मात्र कार्यक्रम चल्छ भन्ने सोच गलत हो। आफ्नो गाउँ, आफ्नो माटोप्रतिको माया कहिल्यै क्षीण हुँदैन।”
मेलाको सफलताको शुभकामना दिँदै उनीहरूले आगामी दिनमा स्थानीय प्रतिभालाई प्राथमिकता दिने अपेक्षा व्यक्त गरेका छन्।
