नेपाली लोकसंगीत बजारमा गीतको भीड बढ्दै जाँदा पनि समाजको वास्तविक पीडा बोल्ने सिर्जना भने कमै देखिन्छन्। लाइभ दोहोरीमार्फत आफ्नो छुट्टै पहिचान बनाइसकेका गायक सुमन परियारले यस्तै यथार्थ बोकेको नयाँ गीत ‘डिप्रेसन’ सार्वजनिक गरेका छन्।

सुमन परियार र गायिका मेनुका सोनीको स्वर रहेको यस गीतमा शब्द र लय पनि सुमनकै छन्। “तिम्ले नाता अर्कैसँग जोडेमा डिप्रेसनमै जान्छु, साथ छोडेमा…” जस्ता भावुक शब्दले प्रेममा हुने असुरक्षा, डर र मानसिक पीडालाई सिधा रूपमा उजागर गरेका छन्। प्रेम टुटेपछि युवाको मनमा पर्ने गहिरो असरलाई गीतले सहजै महसुस गराउँछ।

बिमल छिनालको एरेन्ज, मिक्सिङ र मास्टरिङले गीतलाई थप प्रभावशाली बनाएको छ। भिडियोमा सुमन परियार र सञ्चिता बोलखेको अभिनय सरल तर भावनात्मक देखिन्छ, जसले कथालाई अझ जीवन्त बनाएको छ।

प्रेममा धोका पाएपछि पछिल्लो समय धेरै नेपाली युवा डिप्रेसनतर्फ धकेलिँदै गएको यथार्थलाई गीतले स्पष्ट रूपमा देखाएको छ। गम्भीर विषय भए पनि निर्देशक जेर्री भण्डारीले यसलाई नृत्यात्मक शैलीमा प्रस्तुत गरेका छन्, जसले पीडालाई फरक ढंगले अभिव्यक्त गरेको छ। भिडियोको सम्पादन तथा कलरिङ सुमन कोइरालाले गरेका हुन्।

युवा पुस्तालाई लक्षित गरेर तयार गरिएको ‘डिप्रेसन’ मनोरञ्जन मात्र नभई चेतनाको सन्देश बोकेको गीतका रूपमा देखिएको छ। मेनुका सोनी अफिसियल युट्युब च्यानलमार्फत सार्वजनिक गरिएको यस गीतले प्रेम, पीडा र मानसिक स्वास्थ्यबारे सोच्न बाध्य बनाउने अपेक्षा गरिएको छ।

हेर्नुहोस् गीत