काठमाडौं । रसुवामा बुधबार बिहान आएको अचानकको बाढीपछि १९ जना प्रहरी सम्पर्कविहीन भएका छन्।

बागमती प्रदेश प्रहरीका अनुसार रसुवागढी प्रहरीचौकीमा कार्यरत २२ प्रहरीमध्ये ९ जना सम्पर्कमा आएका छन् भने १३ जना अझै सम्पर्कविहीन छन्। त्यस्तै, स्याफ्रुबेसीमा कार्यरत ९ प्रहरीमध्ये ३ जना सम्पर्कमा आए पनि ६ जना सम्पर्कविहीन रहेको छ ।

बाढीका कारण प्रहरी कार्यालयसमेत बगाएको बताइएको छ। यस्तै, टिमुरे बीओपीमा कार्यरत ९ जना सशस्त्र प्रहरी पनि सम्पर्कविहीन भएका छन्।

बुधबार बिहान करिब ९ बजे एक्कासि आएको बाढीले टिमुरे, स्याफ्रुबेसीलगायतका क्षेत्रमा ठूलो क्षति पुर्‍याएको छ। विपद् प्रभावित क्षेत्रमा नेपाली सेना, नेपाल प्रहरी र सशस्त्र प्रहरी गरी तीनवटै सुरक्षा निकाय परिचालन गरिएको छ।

खोज तथा उद्धारका लागि नेपाली सेनाले दुईवटा हेलिकप्टरसहित टोली परिचालन गरेको छ। धुन्चे, रसुवा र धादिङको गजुरीबाट समेत थप उद्धार टोली प्रभावित क्षेत्रमा पठाइएको छ। अस्पतालमा सेनाका स्वास्थ्यकर्मीसहितको टोली पनि परिचालन गरिएको छ।

सम्पर्कविहीन सुरक्षाकर्मीको खोजी तथा प्रभावित क्षेत्रमा उद्धार कार्यलाई प्राथमिकताका साथ अघि बढाइएको सुरक्षा निकायले जनाएको छ।