काठमाडौं । वैदेशिक रोजगारीका लागि क्यानडा पठाइदिने भन्दै २६ जनाबाट करिब २ करोड ५० लाख रुपैयाँ ठगी गरेको आरोपमा पूर्वमाओवादी लडाकु लहानुराम चौधरी पक्राउ परेका छन्।
प्रहरीका अनुसार कैलालीको लम्कीचुहा नगरपालिका–६ स्थायी घर भई हाल काठमाडौंको चन्द्रागिरि नगरपालिका–५ बस्दै आएका ४६ वर्षीय चौधरीले क्यानडामा आकर्षक रोजगारी दिलाइदिने प्रलोभन देखाएर विभिन्न व्यक्तिबाट ठूलो रकम असुलेका थिए।
पीडितहरूबाट रकम संकलन गरेपछि उनी सम्पर्कविहीन बनेको भन्दै २६ जनाले उजुरी दिएका थिए। सोही उजुरीका आधारमा प्रहरीले उनलाई पक्राउ गरी आवश्यक कानुनी प्रक्रिया अघि बढाएको जनाएको छ। घटनाबारे थप अनुसन्धान भइरहेको प्रहरीले जनाएको छ।
वैदेशिक रोजगारीको नाममा हुने ठगीका घटना बढ्दै गएको भन्दै प्रहरीले सर्वसाधारणलाई आकर्षक रोजगारीका प्रलोभनमा नपर्न तथा सम्बन्धित निकायबाट आवश्यक जानकारी लिएर मात्र प्रक्रिया अघि बढाउन आग्रह गरेको छ।
