फिल्म ‘मिरमिरे’मा अभिनेता प्रकाश सपूत अनुबन्ध भएका छन्। भेट्रान अभिनेता दयाहाङ राईपछि अभिनेता प्रकाशलाई यस फिल्ममा अनुबन्धित गरिएको हाे। ‘मिरमिरे’बाट प्रकाश र दयाहाङले पहिलो पटक सहकार्य गर्न लागेका हुन्। ‘हामी कलाकारसँग सम्झौताकै क्रममा छौँ। केहीसँग कुरा भइरहेको छ। हामी अहिले बजारले रुचाएका र अभिनयमा पक्कड भएका कलाकारलाई नै लिएर काम गर्नेछौँ,’ निर्देशक यम शेर्पाले भने।अन्य कलाकारबारे हालसम्म यो टिमले जानकारी दिएको छैन। प्रकाश यो सिनेमामा अभिनेताका रूपमा मात्रै रहनेछन् वा सांगीतिक पाटोमा पनि जोडिनेछन् भन्नेबारे पछि स्पष्ट पार्ने यमले बताए।

चलचित्र राम्रो बनाउन कुनै सम्झौता नगर्ने उनले दोहोर्‍याए। ‘मिरमिरे’ यमको दोस्रो निर्देशन हो ।चलचित्र ‘कार्साङ’ फेम्ड निर्देशक यमले ‘मिरमिरे’को कलाकार लाइनअप बलियो हुने उनकाे भनाई छ। प्राविधिकपक्ष पनि सिनेमाको बलियो हुने विश्वास उनले व्यक्त गरे।अभिनेता प्रकाश सपूतले ‘मिरमिरे’मा जोडिन पाउँदा खुशी व्यक्त गरे।

आफ्नो भूमिका विशेष र महत्वपूर्ण रहेको बताउँदै यस सिनेमाले आफूलाई नयाँ उचाइ दिने दाबी गरे।यार्सा फिल्म्सको प्रस्तुति रहने चलचित्रले ग्रामीण परिवेशको सामाजिक कथा भन्ने छ। चलचित्रको निर्देशनसँगै स्टोरी पनि यम शेर्पा स्वयंले लेखेका छन्।निमु शेर्पा, छोङ्बा लामा शेर्पा र आङ्छिरिङ शेर्पा निर्माता रहेको ‘मिरमिरे’का सह–निर्मातामा गोविन्द बोहरा र ईश्वर श्रेष्ठ छन्। यो चलचित्रको कार्यकारी निर्मातामा आरआर फिल्मसका सञ्चालक समेत रहेका चलचित्र वितरक रोहित कट्टेल रहेका छन्।‘मिरमिरे’लाई २०८२ मा रिलिज हुनेछ। प्रदर्शन मिति भने तय भएको छैन। चलचित्रलाई आरआर फिल्मसले वितरण गर्नेछ।