काठमाडौं । नेपाली कांग्रेसका सभापति गगन थापाले प्रधानमन्त्रीको भूमिकामा प्रश्न उठाउँदै असन्तुष्टि जनाएका छन् । रास्वपा सभापति रवि लामिछानेले सिंहदरवारमा डाकेको सर्वदलीय बैठकमा सहभागी भएर बाहिरिने क्रममा सभापति थापाले प्रधानमन्त्रीले सुनसरीको साम्प्रदायिक विवादमा समेत सबैलाई एकै ठाउँ राख्न पहल नगरेकोमा असन्तुष्टि जनाए ।

“म पुराना कुरा केही पनि गर्दिंन, जहाँ भन्नुपर्ने हो त्यहाँ भन्नुस्,” प्रधानमन्त्रीलाई थापाले भने, “यस्तो बेला प्रधानमन्त्रीले प्रधानमन्त्री जस्तै बन्नुपर्छ । म जस्तो छु त्यस्तै रहन्छु भनेर हुँदैन ।”

उनले अहिले दलका नेताले गरेको आह्वानलाई व्यवास्ता गर्ने र धार्मिक नेताका आह्वान मान्ने अवस्था रहेको भन्दै प्राधानमन्त्रीले पहल कदमी लिनुपर्ने बताए ।

“यस्तो समयमा सरकारकै तर्फबाट संवाद गरिनुपर्छ । यस्तो समयमा हामी नेताहरूको महत्व सानु हुन्छ । हामीले गरेको आह्वानलाई नमान्ने, धर्मिक नेताहरूको आह्वानलाई मान्ने ठूलो जमात छ,” थापाले भने, “प्रधानमन्त्री त मेरो पनि प्रधानमन्त्री हो, तपाईंको पनि प्रधानमन्त्री हो, उहाँ सबैको प्रधानमन्त्री हो । यस्तो समयमा प्रधानमन्त्रीले प्रधानमन्त्रीजस्तै बन्नुपर्‍यो ।”

उनले सर्वदलीय बैठकमा आआफ्ना असन्तुष्टि राखे पनि समाधानका लागि एक ठाउँ हुने अवसर सरकारले गुमाइरहेको बताए । समान्य समयका लागि आफूहरू प्रतिपक्षी भएको भन्दै देशमा संकट आएका बेला प्रतिपक्षी पनि प्रधानमन्त्रीकै टिम हुने उनको भनाइ छ ।