काठमाडौं। नेकपा (एमाले) का नेता गोकुल बास्कोटाले सुनसरीको देवानगञ्जमा भएको तनावका सन्दर्भमा प्रधानमन्त्री वालेन्द्र शाह र गृहमन्त्री सुधन गुरुङको भूमिकामाथि प्रश्न उठाएका छन्।

सामाजिक सञ्जालमार्फत धारणा सार्वजनिक गर्दै बास्कोटाले प्रधानमन्त्री र गृहमन्त्री सर्वदलीय बैठकमा अनुपस्थित हुनु उनीहरूको राजनीतिक शैली र कार्यशैलीसँग मेल खाने विषय भएको टिप्पणी गरेका छन्।

‘प्रधानमन्त्री बालेन्द्र शाह र गृहमन्त्री सुधन गुरुङ सर्वदलीय बैठकमा नजानु उनीहरूको राजनीतिक मान्यता, स्वभाव र उदयका आधारका दृष्टिले दुःखद विषय नै होइन’, उनले भने, ‘ती त श्मशान जाग्ने बेला बिउँझन्छन् अनि फेसबुक स्टाटसमै साक्षात्कार हुन्छन्। अर्को बेला होटल र नाकामा छापा मार्दा धम्क्याउँदै गर्जेको देखिन्छ।’

उनले राष्ट्रिय स्वतन्त्र पार्टीका सभापति रवि लामिछानेप्रति पनि टिप्पणी गर्दै निरीह भनेका छन् ।

‘दुःखको कुरा सभापति रवि लामिछाने आफ्नै सत्तासामु निरीह बनेका छन्,’ बास्कोटाले उल्लेख गरेका छन्।