पोखरा महानगरपालिका वडा नं. १९ लामाचौर गोस्ती निवासी ५० वर्षीया निता बर्देवा नेपालीलाई चर्चित गीत ‘स्याउली बजार’ की मोडल तथा लगानीकर्ता कोमल नेपालीले आर्थिक सहयोग प्रदान गरेकी छन्। ‘स्याउली बजार’ गीतकी मोडल तथा लगानीकर्ता कोमल नेपालीले आयोजित एक विशेष कार्यक्रममा पीडित परिवारलाई नगद रु ५० हजार हस्तान्तरण गरिन्। साथै हाल कुवेतमा बसोबास गर्दै आएकी विष्णुमाया नेपालीले पठाएको रु ५ हजार रकम पनि परिवारलाई हस्तान्तरण गरिएको थियो।
दुवै मृगौला फेल भई विगत दुई वर्षदेखि डायलोसिस गराइरहेकी निता बर्देवा नेपाली हाल पश्चिमाञ्चल क्षेत्रीय अस्पतालमा उपचाररत छन्। पारिवारिक आर्थिक अवस्था अत्यन्त कमजोर रहेको र मृगौला प्रत्यारोपण गर्न करिब २० लाख रुपैयाँ खर्च लाग्ने भएकाले परिवारले सहयोगको अपिल गर्दै आएको छ।
कार्यक्रममा बोल्दै कोमल नेपालीले ‘स्याउली बजार’ गीतले युट्युब, टिकटक र फेसबुकमार्फत उल्लेखनीय सफलता हासिल गरेको बताइन्। उनका अनुसार गीतले युट्युबमा झन्डै ३ करोड दर्शक–श्रोताको माया पाइसकेको छ।
गीतबाट प्राप्त आम्दानीको केही हिस्सा सामाजिक सेवामा खर्च गर्ने उद्देश्यले पीडितलाई सहयोग गरिएको उनले बताइन्। गीतको सफलतासँगै टिमले सामाजिक उत्तरदायित्वसमेत निर्वाह गरेको भन्दै स्थानीयवासीले प्रशंसा गरेका छन्।
