काठमाडौं । प्रधानमन्त्री बालेन्द्र शाहले उद्धार तथा राहत कार्यका लागि रसुवाको बाढी प्रभावित क्षेत्रमा नेपाली सेना, सशस्त्र प्रहरी बल र नेपाल प्रहरी परिचालन गरिएको जनाएका छन् ।

अन्य जिल्लाहरू बाट पनि अतिरिक्त जनशक्ति प्रभावित क्षेत्र तर्फ प्रस्थान गरिसकेको प्रधानमन्त्री शाहले आफ्नो फेसबुक पेजमा उल्लेख गरेका छन् ।

“विपद् व्यवस्थापन प्राधिकरण सक्रिय छ, मेडिकल टिम, स्काउट, रेडक्रस सबै सँग समन्वय हुँदै आवश्यक कदम चाल्न काम सुरु भएको छ । अतिरिक्त एम्बुलेन्स र मेडिकल जनशक्ति पनि प्रभावित एरियामा पठाउने प्रक्रिया अघि बढिसकेको छ,” प्रधानमन्त्री शाहले भनेका छन् ।

तल्लो तटीय क्षेत्रका बासिन्दाहरूलाई तत्काल सुरक्षित स्थानमा स्थानान्तरण गर्न सम्बन्धित जिल्ला प्रशासन कार्यालयलाई निर्देशन दिइएको उनले जनाएका छन् ।

“सम्भावित उद्धार तथा राहत कार्यका लागि सबै हेलिकोप्टरहरूलाई प्रभावित क्षेत्रतर्फ पठाइएको छ । निजी हेलिकोप्टर कम्पनीहरूलाई पनि हेलिकोप्टरहरु स्टयाण्डबाई राख्न जानकारी गराइएको छ भने केही हेलिकोप्टर प्रभावित क्षेत्र तर्फ गएका छन्,” प्रधानमन्त्री शाहले भनेका छन् ।

प्रधानमन्त्री शाहले अबको केही बेरमा आगामी आवश्यक कदमहरू चाल्न उच्च स्तरीय बैठक बोलाइएको जनाएका छन् ।