सरकारले लामो समयदेखि बन्द रहेको हेटौंडा कपडा उद्योग पुनः सञ्चालन गर्ने जिम्मेवारी नेपाली सेनालाई दिएको छ। असार १८ गते बसेको मन्त्रिपरिषद् बैठकले उद्योग सञ्चालनको प्रारम्भिक जिम्मेवारी सेनालाई दिने निर्णय गरेको हो। नेपाली सेनाका अनुसार पहिलो चरणमा उद्योगका मेसिनको अवस्था अध्ययन तथा मर्मत–सम्भार गरिने, त्यसपछि प्राविधिक सम्भाव्यता प्रतिवेदन तयार पारिने र परीक्षण उत्पादन सुरु गरिनेछ।

उद्योग, वाणिज्य तथा आपूर्ति मन्त्रालयले सम्भाव्यता अध्ययनका लागि ३३ लाख रुपैयाँ बजेटसमेत निकासा गरिसकेको छ। सेनाले उद्योगमा रहेका मेसिन सञ्चालनयोग्य छन् वा छैनन्, मर्मतमा कति समय र लागत लाग्छ भन्ने विषयमा अध्ययन गरी प्रतिवेदन तयार गर्ने जनाएको छ। त्यसपछि परीक्षण उत्पादनका आधारमा उद्योगको आधुनिकीकरण र व्यावसायिक सञ्चालनको योजना अघि बढाइनेछ। चीन सरकारको आर्थिक तथा प्राविधिक सहयोग र नेपाल सरकारको लगानीमा २०३२ सालमा स्थापना भएको हेटौंडा कपडा उद्योगले २०३५ सालदेखि व्यावसायिक उत्पादन सुरु गरेको थियो।

एक समय नेपाललाई सुती कपडामा आत्मनिर्भर बनाएको उद्योगबाट भारतमा समेत कपडा निर्यात हुने गरेको थियो। तर व्यवस्थापन कमजोरी, प्रविधिको आधुनिकीकरण हुन नसक्नु, बजार व्यवस्थापनको अभाव, लोडसेडिङ र बढ्दो सञ्चालन खर्चका कारण उद्योग २०५६ सालदेखि बन्द अवस्थामा पुगेको थियो। नेपाली सेनाले यसअघि नै उद्योग पुनः सञ्चालन सम्बन्धी प्रारम्भिक अध्ययन गर्दै सैनिक कल्याणकारी कोषको लगानी र सेनाकै व्यवस्थापनमा उद्योग सञ्चालन गर्न सकिने प्रस्ताव सरकारसमक्ष पेश गरेको थियो। सेनाको अध्ययनअनुसार प्रारम्भिक चरणमा वार्षिक करिब २६ लाख मिटर कपडा उत्पादन गरी नेपाली सेना, नेपाल प्रहरी, सशस्त्र प्रहरी तथा अन्य सरकारी निकायको कपडाको माग स्वदेशमै पूरा गर्न सकिने उल्लेख गरिएको छ। सरकारको निर्णयसँगै अब हेटौंडा कपडा उद्योग पुनर्जीवित गर्ने प्रक्रिया औपचारिक रूपमा अघि बढेको छ।