काठमाडौं । नेपाली कांग्रेस संसदीय दलका नेता भीष्मराज आङ्देम्बेले चुनावअघि विदेशका गल्लीमा स्टिकर टाँसेर युवालाई स्वदेश फर्काउने योजना कहाँ गयो भन्दै प्रश्न उठाएका छन् ।

अन्तर्राष्ट्रिय युवा दिवसको शुभकामनाको सन्दर्भ जोड्दै उनले चुनावताका रास्वपा सभापति रवि लामिछानेले गरेको वाचा स्मरण गराएका हुन् । उनले २०८२ को भदौ तेस्रो साता गरेको जेनजी विद्रोहले रोजगारी, सुशासन, जवाफदेहिता र देश निर्माणको जनादेश मागेको र त्यसपछिको जनादेश र मतादेशको वर्तमान सरकारले प्रतिनिधित्व गर्दै आएको उल्लेख गरेका छन् ।

सरकारले १०० दिनमा नै स्टिकर टाँस्ने र विदेशिएका युवा फर्काउने घोषणा गरेको तर, एकजनालाई पनि फर्काउन नसकेको उनको भनाइ छ । सरकारको घोषणाले उत्साही युवाहरू फेरि विस्तारै निराशातिर फर्किएको महसुस हुन थालेको उनको भनाइ छ । त्यसका केही ज्वलन्त घटना देशमै स्वरोजगार भएका युवा उमेरका गणेश नेपालीदेखि विवेक मण्डलले गरेको आत्मदाह रहेको उनको ठहर छ ।

उनले युवालाई मतदान गर्ने जमात मात्रै नभई, राष्ट्र निर्माणको नेतृत्व गर्ने शक्तिका रूपमा राज्यले स्वीकार गर्नुपर्नेमा जोड दिए छन् ।