काठमाडौं । नेपाली कांग्रेसले वरिष्ठ नेता तथा पूर्वउपप्रधानमन्त्री गोपालमान श्रेष्ठको निधनप्रति दुःख व्यक्त गर्दै तीन दिनसम्म शोक मनाउने निर्णय गरेको छ ।

नेपाली कांग्रेस केन्द्रीय कार्यसमितिको आज बसेको आकस्मिक बैठकले श्रेष्ठको निधनप्रति शोक व्यक्त गर्दै श्रद्धाञ्जली अर्पण गरेको हो । ७९ वर्षीय श्रेष्ठको ललितपुरको जावलाखेलस्थित हेलिअस अस्पतालमा उपचारका क्रममा मंगलबार निधन भएको थियो ।

कांग्रेसले जारी गरेको शोक प्रस्तावमा श्रेष्ठलाई लोकतन्त्र स्थापना, पुनःस्थापना र सुदृढीकरणका आन्दोलनमा नेतृत्वदायी भूमिका निर्वाह गर्ने अग्रज नेताका रूपमा स्मरण गरेको छ । विद्यार्थी जीवनदेखि नै कांग्रेस राजनीतिमा सक्रिय रहेका श्रेष्ठले पार्टीका विभिन्न जिम्मेवारी सम्हाल्दै करिब ६ वर्ष जेल जीवनसमेत बिताएका थिए ।

श्रेष्ठ २०४८, २०५६ र २०६४ मा स्याङ्जाबाट प्रतिनिधिसभा सदस्यमा निर्वाचित भएका थिए भने २०७० को संविधानसभा निर्वाचनमा समानुपातिक प्रणालीबाट संविधानसभा सदस्य बनेका थिए ।

उनले नेपाल सरकारमा उपप्रधानमन्त्रीका साथै भौतिक योजना तथा निर्माण, वन तथा वातावरण, वाणिज्य तथा शिक्षा मन्त्रीका रूपमा जिम्मेवारी सम्हालेका थिए । उनी नेपाली कांग्रेस संसदीय दलका पूर्वप्रमुख सचेतकसमेत थिए ।

कांग्रेसले श्रेष्ठको निधनबाट पार्टीले एक अनुभवी र अग्रज राजनीतिज्ञ गुमाएको उल्लेख गर्दै संगठन निर्माण, लोकतन्त्रप्रतिको प्रतिबद्धता र सार्वजनिक जीवनमा उनले पुर्‍याएको योगदान सधैँ स्मरणीय रहने जनाएको छ ।

शोक कार्यक्रमअन्तर्गत कांग्रेसले १३, १४ र १५ साउनसम्म पार्टीको केन्द्रीय कार्यालय, प्रदेश कार्यालय र जिल्ला कार्यालयहरूमा झण्डा आधा झुकाउने निर्णय गरेको छ । त्यस्तै, १४ साउनमा केन्द्र, प्रदेश र जिल्लास्थित सबै पार्टी कार्यालय बन्द गर्ने निर्णय गरिएको छ ।

श्रेष्ठको सम्मानमा स्वर्गारोहणको १३ दिनसम्म पार्टीका कार्यालयहरूमा शोक पुस्तिका राखिने र १३औँ दिनमा उनको गृह जिल्ला स्याङ्जाको कालिगण्डकी राम्दीघाटमा अस्तु विसर्जन गरी शोकसभा आयोजना गरिने कांग्रेसले जनाएको छ ।