काठमाडौं । अविरल वर्षाका कारण कीर्तिपुरस्थित राधास्वामी होल्डिङ सेन्टर डुबानमा परेपछि त्यहाँ आश्रय लिइरहेका ३१ परिवारका ८९ जना सुकुम्बासीलाई भक्तपुरको खरिपाटीस्थित होल्डिङ सेन्टरमा स्थानान्तरण गरिएको छ।

अधिकारीहरूका अनुसार शनिबार र आइतबार बिहान गरी उनीहरूलाई सुरक्षित रूपमा खरिपाटी पुर्‍याइएको हो। केही सुकुम्बासी परिवारलाई भने भक्तपुरकै बोडे क्षेत्रमा समेत स्थानान्तरण गरिएको छ।

सरकारले यसअघि थापाथलीलगायत बागमती नदी किनारका सुकुम्बासी बस्ती हटाएर विभिन्न होल्डिङ सेन्टरमा राखेको थियो। तर स्थायी आवासको व्यवस्था अझै हुन नसक्दा उनीहरू अस्थायी आश्रयमै बस्न बाध्य छन्।

पछिल्लो अविरल वर्षासँगै कीर्तिपुरस्थित होल्डिङ सेन्टरमा डुबान भएपछि त्यहाँ रहेका परिवारलाई सुरक्षित स्थानमा सारिएको हो। प्रभावित परिवारको दीर्घकालीन व्यवस्थापन र सुरक्षित आवासको माग भने अझै कायम रहेको छ।