मानसिक सन्तुलन गुमाएर सडकमा बेवारिसे जीवन बिताइरहेका व्यक्तिहरूको उद्धार तथा पुनर्स्थापनामा सक्रिय ‘नेपाल स्नेही काख’ संस्थाले अन्तर्राष्ट्रिय स्तरको प्रतिष्ठित सम्मान प्राप्त गरेको छ । World Book of Records London ले संस्थाकी सञ्चालिका श्रीनेहा पोखरेल र उनको टिमलाई विशेष अवार्ड प्रदान गरेको हो । संस्थाले लामो समयदेखि सडकमा कष्टकर जीवन बिताइरहेका नागरिकहरूको उद्धार गर्दै उनीहरूलाई गास, बास, कपाससहित आवश्यक स्वास्थ्य र मनोसामाजिक सहयोग प्रदान गर्दै आएको छ ।यही निरन्तर मानवीय सेवाको कदरस्वरूप यो सम्मान प्रदान गरिएको जनाइएको छ । बिहीबार Yak & Yeti Hotel मा आयोजित भव्य समारोहमा बेलायत, भारत र नेपालसहित विभिन्न देशका विशिष्ट व्यक्तित्वहरूको उल्लेखनीय उपस्थिति रहेको थियो । अन्तर्राष्ट्रिय स्तरको उक्त कार्यक्रममा सामाजिक सेवा, मानवता र नेतृत्वलाई केन्द्रमा राख्दै विभिन्न व्यक्तित्वहरूलाई सम्मान गरिएको थियो ।
सम्मान ग्रहण गर्दै श्रीनेहा पोखरेलले यो उपलब्धि आफ्नो व्यक्तिगत नभई सम्पूर्ण टिम, सहयोगी र शुभेच्छुकहरूको साझा प्रयासको परिणाम भएको बताइन् । उनले आगामी दिनमा अझ व्यवस्थित र प्रभावकारी रूपमा सेवा विस्तार गर्ने प्रतिबद्धता पनि व्यक्त गरिन् । ‘नेपाल स्नेही काख’ले गर्दै आएको मानवीय अभियानले समाजका उपेक्षित र असहाय वर्गका लागि आशाको किरण बनेको छ ।
यस सम्मानले संस्थाको कार्यलाई अन्तर्राष्ट्रिय स्तरमा चिनाउने मात्र होइन, यस्ता सेवामूलक अभियानप्रति थप प्रेरणा र समर्थन जुटाउने अपेक्षा गरिएको छ ।
