नेपाली संगीत क्षेत्र पछिल्ला दिनमा गीत ‘घामपानीको छाता’ का कारण निकै तरंगित छ। यही गीतमार्फत उदाउँदै आएका नव–गायक रायन बस्यालले दोस्रो ‘बी–स्टार म्युजिक अवार्ड’ मा वर्षकै सर्वोत्कृष्ट नव–गायकको अवार्ड जित्दै आफ्नो करियरमा महत्वपूर्ण मोड स्थापित गरेका छन्।

उत्कृष्ट पाँच मनोनयनबीचको प्रतिस्पर्धामा रायनले निर्णायकहरू र दर्शक दुवैको मन जित्न सफल भए। छोटो समयमै ठूलो लोकप्रियता कमाएका उनलाई यो अवार्डले नयाँ पुस्ताका सबैभन्दा बलिया सम्भावनायुक्त गायकको रूपमा उभ्याएको छ।

उनले गाएको गीत ‘घामपानीको छाता’ ले युट्युबमा एक करोडभन्दा बढी भ्यूज हासिल गरिसकेको छ। गीतले धार्मिक भिन्नता भित्र विकसिएको प्रेमकथालाई सरल, भावनात्मक र सहज शैलीमा प्रस्तुत गरेको कारणले सबै उमेरका दर्शक–श्रोताबाट राम्रो प्रतिक्रिया पाएको छ।

गीतमा रायनसँग  स्थापित गायिका शान्ति श्री परियारले स्वर दिएकी छन्। उनको अनुभवी आवाज र रायनको ताजा स्वरको संयोजनले गीतलाई अझ आकर्षक बनाएको छ। यद्यपि, गीतको मुख्य पहिचान र लोकप्रियताको केन्द्रमा रायनकै ताजा भोकल, प्रस्तुति र दर्शकमाझ बनेको प्रभावलाई विशेष रूपमा उल्लेख गरिन्छ।

अवार्ड समारोहमा निर्णायकहरूले रायनलाई युवा पुस्ताका लागि प्रेरक प्रतिभा भन्दै उनको मेहनत, स्वर–गुणस्तर र प्रस्तुति क्षमताले भविष्यमा नेपाली संगीत क्षेत्रमा ठूलो प्रभाव पार्ने विश्वास व्यक्त गरे।

अवार्ड ग्रहण गर्दै रायनले दर्शक–श्रोताको माया र समर्थन नै आफ्नो सबैभन्दा ठूलो प्रेरणा भएको बताए। उनले आगामी दिनमा अझ परिश्रमसहित नयाँ र फरक सिर्जना प्रस्तुत गर्ने प्रतिवद्धता व्यक्त गरे।

यतिबेला ‘घामपानीको छाता’ र त्यसमार्फत चम्किएका रायन बस्याल नेपाली संगीत बजारमा नयाँ ऊर्जा र आशाको रूपमा उदाइरहेका छन्। यो उपलब्धिले उनीलाई मात्र होइन, नेपाली संगीत उद्योगमा नयाँ प्रतिभाप्रतिको विश्वासलाई पनि थप मजबुत बनाएको छ।