सेढवा, 29 कात्तिक

जोखिममा रहेका बालबालिकाको सिकाइ सहज बनाउन दीप नेपालले ठोरी गाउँपालिका–४, निर्मलबस्तीस्थित नेपाल राष्ट्रिय आधारभूत विद्यालयका ३२ विद्यार्थीलाई न्यानो पोसाक वितरण गरेको छ। विद्यालयका प्रधानाध्यापक गोपीलाल श्रेष्ठका अनुसार न्यानो पोसाक पाएपछि विद्यार्थीहरूलाई चिसो मौसममा विद्यालय आउन थप सहज हुने विश्वास लिइएको छ।

त्यस्तै, बिहीबार संस्थाले ठोरी गाउँपालिका–३ स्थित नेपाल राष्ट्रिय विद्यालयमा समेत १० जना अति विपन्न विद्यार्थीलाई विद्यालय पोसाक वितरण गरेको छ। विद्यालयले पोसाक प्राप्त गरेपछि विद्यार्थीको नियमित उपस्थितिमा सकारात्मक प्रभाव पर्नेसम्मको अपेक्षा व्यक्त गरेको छ।

विगत चार वर्षदेखि दीप नेपालले बेचबिखनमा पर्न सक्ने तथा विभिन्न जोखिम अवस्थाबाट प्रभावित बालबालिकालाई लक्षित गर्दै निरन्तर सिकाइ–सहजीकरण कार्यक्रम सञ्चालन गर्दै आएको छ। यस क्रममा बालबालिकालाई विद्यालयतर्फ आकर्षित गर्न तथा उनीहरूको आवश्यकतालाई ध्यानमा राख्दै पोसाक वितरण गरिएको संस्थाले जनाएको छ।

यसबाहेक, दीप नेपालले ठोरी गाउँपालिकाका सम्पूर्ण विद्यालयका शिक्षकहरूलाई लक्षित गरी एकदिने अभिमुखीकरण कार्यक्रम पनि सम्पन्न गरेको छ। उक्त कार्यक्रममा जोखिम न्यूनिकरण, सिकाइ पद्धति सुधार तथा बालमैत्री वातावरण निर्माणबारे विशेष प्रशिक्षण प्रदान गरिएको थियो।

दीप नेपालका अध्यक्ष बिष्णु सापकोटाका अनुसार संस्था आगामी दिनहरूमा पनि समुदायमा प्रभाव पार्ने क्षेत्रहरूमा निरन्तर काम गर्दै जाने प्रतिबद्धता व्यक्त गरेका छन्।