काठमाडौं । इरानले अमेरिकाले प्रस्ताव गरेको युद्धविराम सम्झौता अस्विकार गरेको द न्युयोर्क टाइम्सले इरानी र इराकी अधिकारीहरूलाई उद्धृत गर्दै जनाएको छ ।

सीएनएनको समाचारअनुसार उक्त प्रस्ताव इराकका प्रधानमन्त्री अली अल–जाइदीले तेहरान पुगेर इरानी नेतृत्वसमक्ष गरेका थिए । प्रस्तावका सबै विवरण सार्वजनिक गरिएको भने छैन । तर, इरानी अधिकारीहरूका अनुसार, होर्मुज जलमार्गमाथिको नियन्त्रणसम्बन्धी विवाद समाधान नगरी गरिने अस्थायी युद्धविराममा तेहरानको कुनै रुचि छैन । यस विषयमा प्रतिक्रिया लिन सीएनएनले ह्वाइट हाउससँग सम्पर्क गरेको जनाएको छ ।

अमेरिकासँगको करिब दुई सातादेखि जारी सैन्य आक्रमणका बीच इरानले उक्त प्रस्ताव अस्वीकार गरेको समाचार सार्वजनिक भएको हो ।

यस अवधिमा इरानले अमेरिकी नौसैनिक नाकाबन्दी पुनः लागु गरिए पनि होर्मुज जलमार्ग हुँदै आवतजावत गर्ने जहाजहरूमाथि आक्रमण जारी राखेको छ । साथै, मध्यपूर्वमा रहेका अमेरिकी सैन्य लक्ष्यहरूलाई पनि निशाना बनाइरहेको छ । अर्कोतर्फ अमेरिकाले इरानभरिका सैन्य अड्डा तथा पूर्वाधारमाथि हवाई आक्रमण तीव्र बनाएको छ ।

इराकका प्रधानमन्त्री अली अल–जाइदी गत साता ह्वाइट हाउसमा अमेरिकी राष्ट्रपति डोनाल्ड ट्रम्पसँग भेटवार्ता गरेपछि बिहीबार तेहरान पुगेका थिए ।

इरान भ्रमणअघि इरानी विदेशमन्त्री अब्बास अराघचीले अल–जाइदीले ट्रम्पका सन्देश वा धारणा लिएर आउन सक्ने बताए पनि इरानले अमेरिकासँग थप कुनै मध्यस्थताको खोजी नगरेको स्पष्ट पारे ।

इरानको सरकारी प्रसारण संस्था आईआरआईबीसँग कुरा गर्दै अराघचीले भने, “मुख्य अवरोध अमेरिकाको अविवेकी, अत्यधिक हस्तक्षेपकारी र प्रभुत्ववादी नीति हो ।”

उता, अमेरिकी राष्ट्रपति डोनाल्ड ट्रम्पले पनि बिहीबार इरानप्रति कडा अभिव्यक्ति दिएका छन् । उनले इरान अहिले कुनै सम्झौताका लागि तयार नरहेको र इरानी नेतृत्वका दुष्ट मनसाय रहेको आरोप लगाएका छन् ।