काठमाडौं – नेपाल पर्वतारोहण संघ (NMA)को २०८२ साल भदौं ७ गते (२०२५ अगस्ट २३) हुने निर्वाचन नजिकिँदै गर्दा पर्यटन क्षेत्रमा सक्रिय व्यवसायी चन्दन थापाले सचिव पदका लागि औपचारिक उम्मेदवारी घोषणा गरेका छन्।

वरिष्ठ पर्यटन व्यवसायी फुर गेल्जे शेर्पाको नेतृत्वमा रहेको साझा तथा स्वतन्त्र समूहबाट उम्मेदवार बनेका थापाले आफ्नो उम्मेदवारीलाई “पर्वतीय पर्यटनको संरक्षण, सम्बर्द्धन र प्रवर्द्धनको अभियान” भन्दै प्रस्तुत गरेका छन्।

“यो मुलुकको हिमाल, पर्वत र आरोहण हाम्रो पहिचान मात्र होइन, सम्पूर्ण विश्वमा नेपालको गौरव हो। यसको रक्षा र विकास मेरो पहिलो प्राथमिकता हुनेछ,” थापाले घोषणाक्रममा भने।

उनी विगत लामो समयदेखि पर्वतीय पर्यटन क्षेत्रमा सक्रिय रहँदै, आरोही र पर्यटन व्यवसायीका हकहितका विषयमा निरन्तर आवाज उठाउँदै आएका छन्। थापाले संघको नेतृत्वमा आएपछि आधुनिक नीतिगत सुधार, अन्तर्राष्ट्रिय प्रचार–प्रसार, तालिम र पूर्वाधार विकासमा जोड दिने बताएका छन्।

सदस्यहरूलाई आफ्नो अमूल्य मत दिन आग्रह गर्दै उनले भने, “मलाई भरोसा छ, हामी सबैको एकताले यो क्षेत्रलाई नयाँ उचाइमा पुर्‍याउनेछ।”

आगामी NMA निर्वाचनमा अनुभवी तथा चर्चित व्यक्तिहरूबीच प्रतिस्पर्धा हुने देखिएको छ, जसमा सचिव पदका लागि चन्दन थापाको उम्मेदवारीलाई धेरैले महत्वपूर्ण मानिरहेका छन्।