सिरानचोक गाउँपालिकाको आयोजना र परोपकार आदर्श माध्यमिक विद्यालय, जौवारीको समन्वयमा आज सिरानचोक गाउँपालिका–८, अर्कुलमा धान दिवस तथा रोपाइँ महोत्सव भव्य रूपमा सम्पन्न भएको छ।
“धान बारीमा साधनता: खाध्य सुरक्षा र आत्मनिर्भरता” भन्ने नाराका साथ आयोजित उक्त कार्यक्रममा गाउँपालिका अध्यक्ष ज्ञानेन्द्र गुरुङको विशेष उपस्थिति तथा सक्रिय सहभागिता रहेको थियो। अध्यक्ष गुरुङले आफैँ खेतमा उत्रिएर रोपाइँ गर्दै किसानहरूको मनोबल उच्च बनाउनुका साथै कृषि संस्कृतिप्रतिको सम्मान प्रकट गर्नुभयो।
कार्यक्रममा स्थानीय किसान, विद्यालयका विद्यार्थी, शिक्षक, अभिभावक, जनप्रतिनिधि तथा विभिन्न संघसंस्थाका प्रतिनिधिहरूको उल्लेखनीय उपस्थिति रहेको थियो। परम्परागत पहिरनमा सजिएर सहभागीहरू रोपाइँ, हिलो खेल, लोक नाच तथा गीतमार्फत कृषि र संस्कृति संरक्षणमा समर्पित देखिए।
कार्यक्रमलाई सम्बोधन गर्दै अध्यक्ष गुरुङले कृषि आत्मनिर्भरता र समृद्धिको मूल आधार भएको बताउँदै यस्ता कार्यक्रमहरूले युवापुस्तालाई कृषि पेशातर्फ आकर्षित गर्न मद्दत गर्ने विश्वास व्यक्त गर्नुभयो। उहाँले गाउँपालिकाले आगामी दिनमा कृषि क्षेत्रलाई प्रविधिमैत्री बनाउने योजनाहरूलाई प्राथमिकता दिने उल्लेख गर्नुभयो।
धान दिवस तथा रोपाइँ महोत्सवले स्थानीय समुदायमा कृषि चेतना अभिवृद्धि गर्नुका साथै आपसी एकता र संस्कृतिप्रतिको गर्व पनि झल्काएको सहभागीहरूको धारणा थियो।
