आफ्ना जीवनका उर्जाशील समय नेपाली गीत संगीतलाई नै समर्पित गरेकी गायिका मिना लामाले आफ्नो पछिल्लो प्रस्तुतिको रुपमा मौलिक सालैजो गीत “आकाशको जुन” सार्वजनिक गरेकी छिन् । उनको यस भन्दा पहिले पनि थुप्रै गीत बजारमा आइसकेका छन् । मौलिक पनमा रमाउन चाहने गायिका मिनाको स्थायी घर धादिङ्ग हो ।

अहिले उनि काठमाण्डौमा रहँदै नेपाली लोक तथा दोहोरी गीत संगीतको क्षेत्र समृद्दीका निमित जुटीरहेकी छिन् । विवाहित मीनाको एक छोरी छिन् । उनले यसपालिको गीतमा आफ्नी छोरीलाई पनि कला क्षेत्रमा उतार्ने प्रयास गरेकी छिन् ।

“आकाशको जुन” बोलको गीतमा सागर गुरुङ र मिना लामाको सुमधुर स्वर सुन्न सकिन्छ । सागर गुरुङ कै लय तथा शब्दद्वारा सजिएको यस गीतको म्युजिक भिडियोमा गायिका मिना लामा कै छोरी सबु तामाङ्गले अभिनय गरेकी छिन् । सबुको कला हेर्दा उनि यस क्षेत्रका लागि निकै राम्रो सम्भावना बोकेकी मोडलको रुपमा अड्कल काट्न सकिन्छ ।

मिना सुपुत्री सबु संगै यस गीतको म्युजिक भिडियोमा बिजय पुनको पनि आकर्षक अभिनय देख्न सकिन्छ । जेरी भण्डारीको निर्देशनमा तयार भएको गीतलाई नवराज उप्रेतीले खिचेका हुन् भने सम्पादन सुजन कोइरालाले गरेका हुन् । गीतलाई गायिका मिना लामा कै युट्युब च्यानल मार्फत सार्वजनिक गरिएको छ ।