काठमाडौं । पछिल्लो समय लाइभ दोहोरी कार्यक्रमहरूमा देखिन थालेका केही अश्लील तथा मर्यादाविपरीत गतिविधिप्रति राष्ट्रिय लोकसञ्चारकर्मी नेपाल उपत्यका समिति ले गम्भीर ध्यानाकर्षण जनाएको छ।
समितिले जारी गरेको धारणा अनुसार, एक लाइभ दोहोरी कार्यक्रममा महिलाको भित्री वस्त्र देखाइने जस्ता अमर्यादित हर्कतले सिङ्गो लोकदोहोरी क्षेत्रकै गरिमा र प्रतिष्ठामाथि आघात पुगेको उल्लेख गरिएको छ। लोक संस्कार, संस्कृति र मौलिकतालाई संरक्षण गर्नुपर्ने ठाउँमा यस्ता गतिविधिले नेपाली लोकसंगीत र दोहोरी संस्कृतिलाई नै बदनाम बनाउने कार्य भइरहेको समितिको भनाइ छ।
समितिका सचिव संजय पोखरेल ले लोक संस्कृतिमाथि प्रहार गर्ने यस्ता अराजक गतिविधि तत्काल रोक्न सम्बन्धित निकायसँग माग गरेका छन्। उनले लोक क्षेत्रलाई विकृति र अश्लीलताबाट जोगाउन सबै कलाकार, सञ्चारकर्मी तथा सरोकारवालाहरू एकजुट हुनुपर्ने बताएका छन्।
समितिले यस्ता गतिविधिमा संलग्न व्यक्तिहरूमाथि आवश्यक छानबिन गरी कडा कारबाही गर्न सम्बन्धित निकायको ध्यानाकर्षण समेत गराएको छ।
