तिजको सांगीतिक माहोललाई थप रंगीन बनाउने उद्देश्यसहित गायिका रचना रिमालले नयाँ तिज गीत ‘बमारी बसायो’ सार्वजनिक गरेकी छन्। आफ्नै युट्युब च्यानलमार्फत सार्वजनिक गरिएको यो गीतमा गायन र अभिनय दुवैमा रचना आफैं प्रस्तुत छ भने उनलाई गायिका तथा कलाकार एलीना चौहान र इन्द्रकला राईले साथ दिएका छन्।

गीतमा रचना, एलीना र इन्द्रकलाले स्वर दिएका छन्। शब्द तथा लय चर्चित सर्जक दीपक शर्माको रहेको छ भने भिडियो निर्देशन गम्भीर बिष्टले गरेका छन्। गीतमा तीनै गायिकाले अभिनयसमेत गरेका छन्, जसले यसलाई झनै आकर्षक बनाएको छ।

सार्वजनिक समारोह तथा पत्रकार सम्मेलनमार्फत गीत राजधानी काठमाडौंमा सार्वजनिक गरिएको हो। कार्यक्रमका प्रमुख अतिथि लोकदोहोरी गायक बद्रि पंगेनी रहेका थिए। पत्रकार सम्मेलनमा बोल्दै रिमालले गीत आफ्नै व्यक्तिगत लगानीमा निर्माण गरिएको जानकारी दिइन्।

उनका अनुसार एलीना र इन्द्रकला उनीसँग समकालीन गायिका मात्र नभई निकट सहकर्मी तथा साथीसमेत हुन्। त्यही आपसी समझदारी र तिज पर्वको साझा भावना गीतको प्रस्तुतिमा देखिन्छ।

गीतमा महिलाको स्वतन्त्रता, आत्मविश्वास र तिजको मौलिक झल्कोलाई रमाइलो व्यङ्ग्यात्मक शैलीमा प्रस्तुत गरिएको छ।

गीत अहिले युट्युबमा उपलब्ध छ र छोटो समयमै सकारात्मक प्रतिक्रिया बटुल्न सफल भएको छ।

🔗 गीत हेर्न यहाँ क्लिक गर्नुहोस्: