काठमाडौं । विश्वकप क्रिकेट लिग-२ अन्तर्गत नामिबिया विरुद्धको महत्वपूर्ण खेलमा नेपाल ७४ बल बाँकी हुँदै ८ विकेटको फराकिलो अन्तरले पराजित भएको छ।
नेपालले दिएको १ सय ५८ रनको लक्ष्य पछ्याएको नामिबियाले ३७.४ ओभरमै २ विकेट गुमाएर पूरा गर्यो।
नामिबियाको प्रभावसाली जितमा माइकल भान लिङगेनले ५१ रनको अर्धशतकीय इनिङ खेल्दा जान फ्र्यालिङकले ७८ रनको अविजित इनिङ खेले।
उनले ८९ बलको सामना गर्दै ८ चौका र १ छक्काको संयमित इनिङ खेलेका थिए। त्यस्तै जन निकोल लोफ्टाइ-इटनले १७ रन बनाए।
नेपालका लागि नन्दन यादव र रोहित पौडेलले १-१ विकेट लिए। त्यसअघि टस हारेर पहिले ब्याटिङ गरेको नेपालले ४६.५ ओभरमा अलआउट हुँदै १ सय ५७ रनमा समेटिएपछि नामिबियाले १ सय ५८ रनको सामान्य लक्ष्य पाएको थियो।
नेपालका लागि कप्तान रोहित पौडेलले ३१ रन बनाउँदा दीपेन्द्र सिंह ऐरीले ३० रन बनाए। त्यस्तै गुल्सन झाले २० रन बनाउँदा सोमपाल कामीले १५ तथा करण केसीले १८ रन बनाए। थप दोहोरो रनको स्कोरका रुपमा आसिफ शेखको १६ रन रह्यो।
नेपाललाई कमजोर स्कोरम समेट्ने क्रममा जेजे स्मिथले ६ विकेट लिंदा ज्याक ब्रासेल र बर्ना स्कोल्जले २-२ विकेट लिए।
