काठमाडौ  । संघीय संसद्अन्तर्गतको संसदीय सुनुवाइ समितिको बैठक आज बस्दै छ ।

बिहान ११ बजे बस्ने बैठकमा प्रमुख निर्वाचन आयुक्त र निर्वाचन आयुक्तको पदमा नियुक्तिका लागि प्रस्तावित व्यक्तिहरूको सम्बन्धमा प्राप्त उजुरी खोल्ने र समिति सदस्यहरूलाई वितरण गर्ने सम्भावित कार्यसूची छ ।

बैठकमा प्रस्तावित व्यक्तिहरूले पेस गरेको कार्ययोजना समिति सदस्यहरूलाई वितरण गर्ने योजना रहेको छ ।

समिति सदस्यरूले प्रस्तावित व्यक्तिहरूको कार्ययोजना र उजुरीको अध्ययन गरेपछि संसदीय सुनुवाइ हुनेछ ।

असार १९ गते बसेको संवैधानिक परिषद्को बैठकले प्रमुख निर्वाचन आयुक्त पदमा मानबहादुर कार्कीलाई नियुक्त गर्न सिफारिस गरेको थियो । सोही बैठकले निर्वाचन आयुक्त पदमा डा. राजीव सुब्बा र गुरुप्रसाद वाग्लेलाई नियुक्त गर्न सिफारिस गर्ने निर्णय गरेको थियो ।

संसदीय समितिबाट प्रस्तावित ती पदहरूको नाम अनुमोदन भएपछि राष्ट्रपतिबाट नियुक्ति हुने संवैधानिक प्रावधान रहेको छ ।