गोरखा, असार ७ – नेकपा (माओवादी केन्द्र) सिरानचोक–चितवन सम्पर्क समन्वय समितिको प्रारम्भिक बैठक आज सम्पन्न भएको छ। बैठकले कमरेड लाल प्रसाद ढकालको संयोजकत्वमा भेला आयोजक समिति गठन गरेको छ।

बैठकमा उपस्थित नेताहरूले पार्टीलाई थप संगठित गर्दै सिरानचोक क्षेत्रलाई संगठनात्मक हिसाबले सुदृढ बनाउने प्रतिबद्धता व्यक्त गरेका छन्।समितिमा सिरानचोक–७ का लाल प्रसाद ढकाल संयोजक चयन भएका छन् भने सिरानचोक–३, हर्मीका किरण पराजुली प्रचारप्रसार संयोजकको जिम्मेवारीमा नियुक्त भएका छन्।

त्यस्तै, वडा तहमा निम्न संयोजकहरू चयन गरिएको जनाइएको छ:

वडा संयोजकहरू:

• दुर्गा दाहाल – वडा नं. १, केरावारी

• यम गुरुङ – वडा नं. २, थालाजुङ

• किरण पराजुली – वडा नं. ३, हर्मी

• जनार्दन पोखरेल – वडा नं. ५, छोप्राक

• लाल प्रसाद ढकाल – वडा नं. ७, श्रीनाथकोट

बैठकमा गण्डकी प्रदेशसभा सदस्य रोहित गुरुङ, भरतपुर महानगरपालिका उप–प्रमुख दीपक ढकाल र काठमाडौँ–गोरखा सम्पर्क समन्वय समितिका कोषाध्यक्ष कपिल भट्टको विशेष उपस्थिति रहेको थियो।

उनीहरूको उपस्थितिले बैठकलाई राजनीतिक रूपमा थप ऊर्जा दिएको सहभागीहरूको धारणा छ।

बैठकले निकट भविष्यमै वृहत सम्मेलन आयोजना गर्ने निर्णय पनि लिएको छ।बैठकमा सहभागी सबै कमरेडप्रति संयोजक लाल ढकालले आभार व्यक्त गर्दै पार्टी संगठन निर्माणमा सबैको सहकार्यले ठुलो मद्दत पुग्ने विश्वास व्यक्त गरेका छन्।

“यहाँहरूकै साथ र सद्भावले सिरानचोकमा पार्टीको नयाँ ऊर्जाका साथ पुनर्गठन अघि बढ्नेछ,” संयोजक ढकालले भने।सम्पर्क समितिको औपचारिक घोषणा र सम्मेलनको मिति चाँडै सार्वजनिक गरिने जनाइएको छ।

by